قلمى الـ5 مللى

حبيبتى الغاليه/
بعد التحيه والاشواق والسلام
بكتبلك من غير حبر او دوايه......بكتبلك باللى جوايا
بكتبلك ورسمة اسمك تحسسنى انك معايا
وحشانى
......واللى مقسي قلبى عليكي يا بنت الخال

مش واحده ست ولا كتر مال
دا الراجل لواحده في ليل الغربة عامل زي حبه ملح في محل حلوانى....ملوش لازمة
ولما الشوق يلفنى ..

..انادي قلمى...

... بسرعه يشيل غطاه

...يلمس قلبي
يرسم صورتك على صفحة قلبى..

..وبسواد سنه يرسم لون شعرك نجوم في ليل الغربه البارد
يرسم عنيكي وصورتى جواها..

... يرسم شجره وترعه وبيت
وانا وانت ماشيين حافين صورتنا على الميه تلاعب البط الابيض
يغار القلم منك
....يزعل.
...اصالحه.
.. اقوله
مهما كنت 5 مللى فانت حته منى
ترسم لحبيبتى في السما طوق نجوم
واحساسي بيها في الليالي نور
يرد القلم في سطور
انت حبيت رسمي
عشقت خطي.
...لونى.
... نقشي...
بص في صورة بنت خالك وفي صورتى
واعرف مين حبيبك
بصيت يا بنت الخال وكمان بصيت

...بصيت وعرفت
لذا مرسل طيه دبلتك ودبدوبك
وكل رسايلك الالكترونيه
وكفايه عليكي جواب بخط قلمى الـ 5 مللي